«Un día», candidata á mellor canción galega de 2018 por aRi[t]mar Galiza e Portugal

A selección do xurado de aRi[t]mar deuse a coñecer nun acto na Escola Oficial de Idiomas de Santiago de Compostela, no que ademais da Mellor canción galega de 2018 tamén se elixirá a Mellor canción portuguesa, e Mellores poemas galego e portugués do ano pasado.

En Son Trío estamos encantadas e moi agradecidas ao xurado desta nova sorpresa que nos dá a canción que compuxemos sobre o poema de Celso Emilio Ferreiro.

A canción foi escollida na 4ª edición que aRi[t]mar Galiza e Portugal organiza para premiar as mellores cancións e poemas de Galiza e Portugal de 2018. Ademais, hai tamén unha votación aberta ata o 20 de marzo para o público xeral.

aRi[t]mar forma parte da Rede da Galisufonía e pretende difundir a música e a poesia, aproximar a cultura e a língua da Galiza e Portugal, e está promovido pola Escola Oficial de Idiomas de Santiago de Compostela e patrocinado polas Secretarías xerais de Cultura e de Política Lingüística, Deputación Provincial da Coruña e Concello de Santiago de Compostela, Agrupamento Europeo de Cooperación Territorial Galicia-Norte de Portugal e Instituto Camões-Centro cultural Portugués de Vigo.

Son Trío quixo facer visible a obra de Celso Emilio gravando tamén un videoclip nas rúas de Vigo, a cidade na que o autor e Antón Beiras afondaran na súa amizade e fraternidade, unha amizade que servira de estímulo para que o poeta creara este cando Xesús Alonso Montero lle comunicou o pasamento de Antón.